-సి హెచ్.వి. బృందావన రావు

ప్రచురణ – ధ్యానమాలిక (జూన్ ’06)

ఎదలోని భావాల్ని ఎవరికీ చెప్పుకోవడం కుదరదు
మధురోహాల మధుమాసాన్ని మనసైన వారితో
ఆనందించడం వీలవదు
ఒక అడుగు ముందుకేస్తే – రెండో అడుక్కు నిషేధం
ఒక ముక్క మాట్లాడింతర్వాత – రెండోది మాట్లాడ్డానికి
అనుజ్ఞ వుండదు
అడుగడుక్కూ అడ్డంకి
నిమిష నిమిషానికీ నిషిద్ధాక్షరి!
ఇష్టమైన చోటికి పోయే వీలుండదు
చెయ్యాలనుకొన్న దాన్ని చేయడానికి వీలుండదు
ఇతరులేమిచేయమంటే అదే చేయ్యాలి
ఎక్కడికి వెళ్ళమంటె అక్క్డికే వెళ్ళి రావాలి
గుండెలుబికి వచ్చే కన్నిళ్ళు ఎన్ని బొట్లు రాలాలో
ముందే నిర్ధేశం
మామూలు సంభాషణల్లో ఎం మాట్లాడాలో కూడా ముందే
నిర్ణయం
పంజరంలోని చిలక పలికినట్లుగా
నోట్లోంచి వచ్చేవన్నీ ఇతరులిచ్చిన దత్తపదులే
ఇంట్లోంచి బయటకు వెడితే ఇకిలింపుల స్వాగతాలు
పనివున్నా లేకున్నా ఆషాఢభూతుల పలకరింపులు
సహచరుల సకిలింపులు – అధికార్ల చొంగకార్పు
అదిరింపులు
మర్యాద కోసం వినక తప్పదు
అడ్డమైన వాళ్ళ అప్రస్తుత ప్రసంగాలు
చదువ్విషయంలో రాజీ – ఉద్యోగ విషయంలో రాజీ
కట్నం విషయంలో రాజీ- కళ్యాణ విషయంలో రాజీ
తండ్రిక్కష్టం కలుగుతుందేమోనని రాజీ – తమ్ముడి
సంతోషంకోసం రాజీ
బ్రతుకంతా ప్రశ్నలే ప్రశ్నలు
అర్ధం లేనట్లు కనిపించే ఆఖరి పద్యపాదం అందంగా
అమరడానికి
సమాధానం సరైందో కాదో గానీ సవాలక్ష సమస్యాపూరణాలు
కన్ను తెరిచిందగ్గర్నించి మన్నులో కలసే దాకా
ఆడదాని జీవితం అహరహం అష్టావధానం!!

–సిహెచ్.వి. బృందావన రావు

ప్రచురణ : Akashicc (అక్టోబర్ ’05)      

దారికడ్డంగా వున్న రాయిని పక్కకు విసిరేసాను.

‘ఛీ’. పనికి మాలినది అంటూ.

‘మిత్రమా!’ నేనేమీ పనికిమాలినదాన్ని కాదు.
నాలాంటి కొన్ని రాళ్ళను పోగుజేసి గోడను నిర్మించొచ్చు.
మంచి పనివాడు నన్నో శిల్పంగా మలచవచ్చు.
ఆ శిల్పాన్నే ఆలయంలో దేవుడిగా ప్రతిష్టించవచ్చు”,
అంటూ చీవాట్లు పెట్టింది రాయి.

నేను చొక్కా మీద దుమ్ము దులుపుకొని,

“ఛీ! పనికిమాలిన దుమ్ము” అంటూ ముందుకు సాగబోయాను.

“సోదరా! నేనూ పనికిమాలిన దాన్ని కాదు.
నాలాంటి దుమ్మును మరికొంత పోగుచేసి ఎరువుగా వాడుకోవచ్చును.
నీటితో పదును చేసి, సారెకెక్కించి, నన్ను కుండగా రూపొందించవచ్చు.
ఆ కుండను చలివేంద్రలో వుంచి దాహార్తుల దప్పి తీర్చవచ్చు”. అంటూ
దుమ్ము దులిపి వదిలిపెట్టింది.

‘సరే బాగుంది’  అనుకొంటూ ముందుక్కదలబోతే
చెట్టు కొమ్మ మీంచి ఓ పండుటాకు ఠాప్పున తలపై రాలింది.
“ఇదో పనికిమాలినది” అని అనుకోబోతుండగానే

“ఏమయ్యోయ్! నేనస్సలు పనికి మాలినదాన్ని కాను.
నాలాంటి ఆకుల్ని దడిగా బిగించి తడికెగా వాడుకోవచ్చు.
నేలలో త్రొక్కి, నీటితో కుళ్ళ బెట్టి కంపోస్టు చేసి భూసారంగా ఉపయోగించుకోవచ్చు.
మీ ఈనాటి విజ్ఞానమంతా పూర్వం ఎండిన ఆకుల మీదనే భద్రపరిచారు తెలుసా.” అని
పాఠం ప్రారంభించింది పలిత పత్రం.

రాయీ, దుమ్మూ, ఆకూ కలసి నన్ను ప్రశ్నించాయి.

“అయ్యా…మనిషిగారూ!
మాలో లేని మస్తిష్కం మీకుందిగదా..
మేమందరం పనికి మాలిన వాళ్ళం – సరే
మీ వలన ఇతరులకేమైనా ప్రయోజనం కలుగుతున్నదా?”అంటూ.

పరులను వంచించి లాభం పొందడంలో అనుక్షణమూ బిజీగా ఉండే నాకు
పరుల కోసం వెచ్చించడానికి తీరిక ఏ మాత్రం లేదని ఎలా సమాధానం చెప్పడం?

సిహెచ్.వి. బృందావన రావు

ప్రచురణ: Akashicc(జూన్ ’06)

సందు మొదట్లో అతని బండి కన్పడగానే వీధి
వీధంతా ఒకసారి మేల్కొంటుందిశ్వేతాశ్వాలను పూన్చిన రధంలొ పార్ధసారధి
కూర్చున్నట్లు బండి ముందు సీటుపై కూర్చొని వచ్చే అతని
కోసం ప్రతి మధ్యాన్నం ఇల్లాండ్లు ఎదురుచూస్తుంటారు.

వంటింట్లోనూ, పెరట్లోనూ పని చేసుకుంటున్న
ఇల్లాండ్లకు పాంచజన్య శంఖ ధ్వనిలా వినిపిస్తుంది అతని
విజిల్ శబ్ధం.

కార్యసాధనే కాని మాటల మాటెత్తని ఖర్మయోగిలా
మౌనంగా ప్రతి ఇంటి ముందూ బండిని నిలిపి
విజిలూత్తాడతను.

ప్లాస్టిక్ సంచిల్లోనో, చెత్తబుట్టల్లోనో భద్రపరచిన పండ్ల తొక్కలనూ, కూరముక్కలనూ, కసుపునూ చిరునవ్వుతో             
శకటాసురిడికి నైవేద్యం చేస్తారు గృహిణులు.

ప్రతి ఇంటి కశ్మలాన్ని మోసుకుంటూ ముందుకు సాగిపోతాడతను.

బండి తనిల్లు దాటాక వచ్చిన అమ్మాయి ‘ ఇదిగో చెత్తబ్బాయ్’
అని వెనుక నుంచి పిలుస్తుంది.

‘చెత్తబ్బాయిని కాదమ్మా – చెత్తబండబ్బాయిని’ అని
జీవన వేదాంతాన్ని వివరించి ఇల్లాండ్లందర్నీ ముసిముసిగా
నవ్విస్తాడతను.

హీరోయిన్ కోసం త్యాగం చేసి లాంగ్‌షాట్‌లో
హొరైజన్లోకి వెళ్ళిపోతున్న పోతున్న హీరోలా అతనూ, అతని బండి
కనుమరుగైన తర్వాత
ఇంటినంతా తుడిచి, శుభ్రం చేసి స్నానం చేసినంత రిలీఫ్ గృహిణులకు.

(-కార్పొరేషన్ చెత్తబండి అబ్బాయికి- అడ్మిరేషన్‌తో)

సిహెచ్.వి.బృందావన రావు

ప్రచురణ : Akashicc (మే ’06)

“వివాహ రహిత సంబంధం
వివాహత్పూర్వ సంబంధం
వివాహేత సంబంధం
స్వలింగ సంబంధం
ఇంతేగదా స్ర్తీవాదమంటే-”
వెక్కిరించింది మగపురుగు.
“పైన చెప్పినవన్నీ
మగవాడి విషయములో తప్పుకానప్పుడు
స్త్రీ విషయంలో తప్పెలా ఔతుందని
నిగ్గదీయడంరా
స్త్రీవాదమంటే”-
ధిక్కరించింది చలిపిడుగు.

- సి. మనస్విని ( సిహెచ్.వి.బృందావన రావు)

ప్రచురణ : పత్రిక (జూన్ ’06)

కాసిని నానీలు

- సి.హెచ్.వి. బృందావన రావు

ప్రచురణ : పత్రిక (మార్చి ’06)

ఇది జ్ఞాపకాల హేమంతం
చలి కౌగిలిని వదిలించుకోలేని
నిస్తేజపు సూర్యుడిలా
గడిచిపోయిన వసంతాల జ్ఞాపకాల కౌగిలిని
వదిలించుకోలేని వృద్ధ హేమంతం!

బ్రతుకు ప్రయాణాన్ని ఒక్కో మజిలీ దాటుకొంటూ
పసితనపు అమాయక స్మృతులనూ
తొలియౌవనపు తొలకరి పులకరింతల గుర్తులనూ
జీవన సహచరి రాగరంజిత కౌగిలింతలనూ
కౌమార్య ఋతువుల్లో మెడకు పెనవేసుకున్న
ఆత్మజుల ఆత్మీయ హస్తాల తామర తూండ్లనూ
మధుమాసాల మనోహర సంగీతాలనూ
శ్రావణ మేఘాల జల్లుల వనావల్లప్పల కేరింతలనూ
అర్ధాంగి తనూ కలసి రాల్చుకొని,
పరస్పరం తుడుచుకొన్న
గ్రీష్మాతాపాల కన్నీళ్ళూ
సింహావలోకనంగా సమీక్షించుకొంటూ
జ్ఞాపకాల బుట్టను నెమ్మదిగా దించుకొంటూ-
నిశ్చలమైపోయిన ప్రశాంత హేమంతం!

ఒక్కో మధురస్మృతి ఒక్కో పండుటాకులా రాలుతూ
అన్ని ఆకులూ రాలాక మోడువారిన చెట్టైన
ఈకాంత శిశిరం కోసం ఇక ఎదురుచూపు!
బ్రతుకు పుస్తకంలో ఆఖరి అధ్యాయం!
చివరి పేజీ తిప్పగానే, ఓ సంపూర్ణ జీవన ఏకాంకికకు
భరతవాక్యపు యువనిక!

-సిహెచ్.వి.బృందావన రావు

ప్రచురణ: నడుస్తున్న చరిత్ర (జనవరి ’06)

చెయ్యేరూ, గుండ్లకమ్మా, మూసీ లాంటి
చిన్న చిన్న వంకవాగులన్నీ
ఒకప్పుడిక్కడ ఏరుండేదని
ఒండ్రు దిబ్బలతో సాక్ష్యం చెపుతున్నాయి.

కృష్ణ కృశించి పోయింది.
గోదావరి గోష్పాదమవుతున్నది.
‘విదారించు ఎదన్, వట్టి ఎడారి తమ్ముడూ’ అని
కన్నీటి కైతలు రాయించుకుంది పెన్న.

ఆగామి కాలంలొ అంగిలి తదుపుకోవడానికి
నిజంగా దొరుకుతుందా నీటిచుక్క?

జలగీతాలు రాస్తున్నారు కవులు
జలయజ్ఞాలంటున్నారు ప్రభువులు
జలబిందువును కాపాడుకోవడం వినా
జనానికి వేరు దారి శూన్యం.

నిర్మల పేయజలంలేని – నిర్జల లోకం రాబోతోందా?
రాబోయే తరాలకోసం – జల సంరక్షణ అనివార్యం.
రేపటి వసంతం కోసం – నేడు విత్తనం నాటు
నేటి కోసం మాత్రమే బ్రతకడం – నేరస్థుల అలవాటు.

-సిహెచ్.వి. బృందావన రావు

ప్రచురణ : నడుస్తున్న చరిత్ర (జులై ’06)

ప్రచురణ: నడుస్తున్న చరిత్ర (మే ’06)

తొలిపొద్దు తిరుగుబాటు 

వెలుగుతూ ఆరుతూ అల్పకాంతితో వున్నదని
హీనంగా చూడకు దాన్ని
అది ఇవ్వాళ మిణుగురే కావచ్చు
రేపు అదే అనంత కాంతి భాండంగా
విస్ఫోటించవచ్చుశత సహస్ర కాంతి జ్వాలా శకలాలుగా
వియత్తును విద్యుదీకరించవచ్చు
దిక్కుల్ను వెలిగిస్తూ, చుక్కల్ని రగిలిస్తూ
కళ్ళు మిరుమిట్లు గొలిపే
వెలుతురు జలపాతంలా దూకవచ్చునల్లని చిన్ని విత్తనమే కదా అని
ఛీత్కారంతో చిదిమేయకు దాన్ని
గొయ్యితీసి పాతిపెట్టి
చిన్ని విత్తును ఛిన్నాభిన్నం చేశానని విర్రవీగకురేపదే మహావృక్షపు మందుపాతరై పేల్తుంది
నేలలోకి వేళ్ళానూ, ఆశాతీరాల్లోకి శాఖలనూ
విస్తరించి
నీ అల్పత్వానికి ఆకాశమెత్తు సాక్ష్యమవుతుంది

-సి.హెచ్.వి. బృందవన రావు

ప్రచురణ: ప్రజాసాహితి (ఆగస్టు 05)